Vermeende renosterstroper in Zambiese park vasgetrek

‘n Namibiër is een van vier gevaarlike vermeende stropers wat in Zambië in verband met renosterstropery in hegtenis geneem is. Die Namibiër, ‘n Angolees en twee Zambiërs het na bewering renosters gejag met ‘n geweer met ‘n teleskoop en knaldemper in Livingstone se Mosi-Oa Tunya Nasionale Park in Zambië. Sakabilo Kalembwe, skakelbeampte van die Zambiese departement van nasionale parke en natuurlewe, het aan Zambiese media gesê die verdagtes is in hegtenis geneem met die onwettige besit van ‘n .308 W kaliber geweer met 12 rondtes ammunisie en die vuurwapen is toegerus met ‘n teleskoop en knaldemper. Kalembwe het gesê ná ondervraging het die vier onthul dat hulle spesifiek vir renosters in die park gekom het.