Jaco Vermeulen

BIOGRAFIE

Jaco het teruggekeer na sy geboorteland in Namibië nadat hy 'n groot deel van sy lewe in Suid-Afrika as onder meer skoolleerling en later as eienaar van twee ondernemings spandeer het.

Hy geniet die vryheid en kultuur wat sy geboorteland bied om sy passies en belangstellings ten volle uit te leef. Hy het besluit met sy terugkeer na Namibië op 12 Maart 2012 om die Suid-Afrikaanse stof finaal van sy voete af te stof en by Kosmos aan te sluit. 

Jaco spandeer sy lewe buite radio op 'n klein stukkie grond buite die hoofstad waar hy nader aan die natuur is en meer ruimte vir sy rits Yorkies kan bied. Jaco is reeds 'n geruime tyd saam met Kosmos as omroeper, nuusleser en nuusskrywer.

Yanna “Flink uit die Vere”

BIOGRAFIE

'n Salm. So het my pa altyd vir my gesê. Dwars, teen die stroom. Dis ekke. Moeilik maar duidelik. En doelgerig. Ek is lief vir my land. Hier gemaak en verseker hier gelaatstaan. Ek kan nie sonder die kameeldoringbome, die Acasia-bloeisels, die reuk van ons reën en die hart van ons mense nie.

Gebore by die Eizabeth Home in Windhoek, het ek 20 jaar later my Drama-graad daar behaal. Toe swot ek Dierkunde want ek het 'n leeu gesoen. Ek is bitter lief vir diere en het 'n swakpunt vir oumensies. Ek het geleer om te aanvaar dat die wêreld nie regverdig is nie maar ek streef na geregtigheid. En eerlikheid. En omgee. My boodskap? Soen die diere. Soen hulle gereeld. En soek altyd die betowering in die lewe. Mik hoog. En glo.