Xi sal blykbaar met Putin, en dan Zelensky, vergader

Die President van China, Xi Jinping beplan glo om die Russiese president, Vladimir Putin volgende week in Moskou te besoek. Volgens Amerikaanse media gaan Xi ná sy vergadering met Putin, ook met die President van Oekraïne Volodymyr Zelensky vergader. Dit sal Xi se eerste vergadering met Zelensky wees sedert die Russiese inval ‘n jaar gelede. Die vergadering sal virtueel plaasvind. Die Amerikaanse Veiligheidsraadgewer, Jake Sullivan sê Oekraïne het nog niks bevestig nie. Indien die vergaderings met Putin en Zelensky plaasvind, sal dit ‘n groot hupstoot wees vir China se geloofwaardigheid as ‘n globale onderhandelaar, ná verlede week se verrassende diplomatieke deurbraak tussen Saoedi-Arabië en Iran wat deur Beijing bemiddel is.