VBS-beslagleggingsbevel teen Zuma word bestudeer

Die Jacob Zuma-stigting sê oudpresident Jacob Zuma sal die jongste hofuitspraak bestudeer en met sy regspan bespreek. Die Hooggeregshof in Pietermaritzburg het aan VBS Mutual Bank ‘n beslagleggingsbevel toegestaan vir 6,5 miljoen Suid-Afrikaanse rand van Zuma se bates om sy lening by die bank te delg. Zuma het in September 2016 ‘n multimiljoen-rand-lening by VBS aangegaan ná ‘n hofbevel dat hy opknappingswerk aan sy huis in Nkandla in KwaZulu-Natal moet terugbetaal. Hy het egter nie die terugbetalingsooreenkoms nagekom nie. Die krediteur kan nie beslag lê op vaste eiendom in Nkandla nie omdat dit op stamgrond in die Ingonyama Trust se besit geleë is.