Egipte en Turkye hervat betrekkinge ná ‘n dekade

Egipte en Turkye het ambassadeurs in mekaar se hoofstede aangestel. Dit is die eerste keer in meer as ‘n dekade dat diplomatieke betrekkinge tussen die twee lande herstel word. Egipte het tien jaar gelede Turkye se ambassadeur uit die land geskop en Ankara daarvan beskuldig dat hy organisasies ondersteun wat die land ondermyn. Samesprekings tussen senior amptenare van die ministeries van buitelandse sake in Ankara en Kaïro het in 2021 begin toe Turkye sy verhouding met Egipte, die Verenigde Arabiese Emirate, Israel en Saoedi Arabië begin versterk het. Die betrekkinge tussen Ankara en Kaïro het op koers gekom nadat die onderskeie Presidente verlede jaar by die Sokker-wêreldbeker in Doha blad geskud het.