Landbou help akkerbouers gereedmaak vir wanneer reën kom

Namibiese boere is bekommerd oor die gebrek aan reën dié reënseisoen. Tradisioneel sal boere hierdie tyd van die jaar ploeg en plant. Dié proses is vertraag weens min of geen reën. Wat doen klein produsente van groente en vrugte wat grootliks afhanklik van reën is? Die goewerneur van die Otjozondjupa-streek James Uerikua sê die landbouministerie help die boere voorberei.


Buitelander bedrieg glo met vals Amerikaanse dollars

‘n Buitelander sal na verwagting vandag op aanklagte van bedrog in die landdroshof in Harrismith in die Vrystaat verskyn. Dit volg nadat ‘n lid van die publiek ‘n polisievoertuig gestop het en aan beamptes gesê het ‘n buitelander het hom bedrieg deur vals Amerikaanse dollars aan hom te gee. Polisielede het die slagoffer kalmeer en bygestaan. ‘n Woordvoerder van die polisie sê hulle het hom na ‘n plaaslike taxistaanplek geneem waar hy ‘n verdagte uitgewys het.


Suid-Afrika verwelkom talle Nuwejaarsbabas

Die Suid-Afrikaanse gesondheidsminister, Joe Phaahla, het 1 764 babas verwelkom wat op Nuwejaarsdag by verskeie openbare gesondheidsgeriewe in die land gebore is. Die eerste baba was ‘n 25-jarige ma se dogtertjie wat om middernag haar opwagting gemaak het by die Shongwe-hospitaal in Mpumalanga. Die woordvoerder, Foster Mohale, sê 894 dogtertjies is gebore teenoor 870 seuns, terwyl 65 ma’s tieners is tussen die ouderdom van 13 en 19 jaar oud.


Dr. Sean de Jager se vermeende aanvallers vasgetrek

Die twee mans wat daarvan beskuldig word dat hulle die 73-jarige dokter Sean de Jager in Oktober verlede jaar op Swakopmund aangeval het, is uiteindelik op die kusdorp in hegtenis geneem. De Jager is ernstig aangerand en beroof, waarna die verdagtes in sy voertuig gevlug het. Die twee verdagtes sal vandag in die Swakopmund-landdroshof verskyn. Sersant Anastacia Frans van die Erongo-streek bedank die informante wat inligting verskaf het.


Kaapse brandbestryders steeds op die toneel by parlement

Brandbestryders was vanoggend steeds op die toneel by die parlementêre kompleks in Kaapstad om seker te maak die brand wat gister uitgebreek het, vlam nie weer op nie. Die burgemeesterskomiteelid vir Veiligheid en Sekerheid, JP Smith, sê sekere dele is nog warm, aangesien die hitte vasgevang is. Die spanne verseker nou ventilasie in die geboue, terwyl die brand en smeulende dele reeds onder beheer gebring is. Smith sê groot dele van die Nasionale Vergadering is deur die brand, water, hitte en rook verwoes. Spanne wag op struktuur-ingenieurs en forensiese deskundiges vir ‘n volledige raming.


Krieket: Marco Jansen vervang Anrich Nortjé

Krieket: Die linkerhandse naatbouler Marco Jansen se skitterende debuut vir Suid-Afrika in die eerste toets teen Indië het vir hom ‘n plek besorg in die eendaggroep teen die besoekers. Hy vervang Anrich Nortjé wat met ‘n heupbesering sukkel. Die keurders het Dwaine Pretorius ingesluit saam met die veelsydige Andile Phehlukwayo en Wayne Parnell, terwyl Zubayr Hamza ook sy plek in die span behou. Temba Bavuma sal die Suid-Afrikaanse span aanvoer in die drie wedstryde wat van 19 tot die 23 Januarie in die Paarl in Kaapstad plaasvind.


Windhoekse Stadspolisiehoof maan teen akkommodasieslenters

Januarie word gekenmerk deur bedrog en slenters, veral met akkommodasie en woonstelle te huur vir studente en jongmense wat in die hoofstad kom werk. Talle families verloor jaarliks duisende Namibiese dollar omdat hulle geld oorbetaal vir die belofte om ‘n blyplek te hou vir ‘n voornemende huurder. Die hoof van die Windhoek Stadspolisie Abraham Kanime het raad.


Hoeveel werksgeleenthede gaan werklik deur groenwaterstof-energieprojek geskep word?

Daar is vroeër kritiek teenoor die regering uitgespreek oor die moontlike werkskepping wat deur die groenwaterstof-energieprojek in Namibië geskep sal word. Kenners is skepties oor die syfers wat deur die regering rondgegooi word omdat die werksgeleenthede gespesialiseerd sal wees. Die onafhanklike ekonoom Gabriel Erastus sê dit hang alles af van watter rigting ingeneem word.

Hy voeg by dat meer inligting oor die projek nodig is voor ‘n bepaling gemaak kan word.


Vryheidsfront Plus bekommerd oor brandskade aan kunswerke in parlement

Die Suid-Afrikaanse parlement is besig met ‘n ondersoek na aanduidings dat geen parlementêre veiligheidspersoneel aan diens was om waarskuwingseine te monitor oor die brand wat gister groot skade aan die parlementsgebou in Kaapstad aangerig het nie. Die Vryheidsfront Plus sê hulle is hartseer oor die verwoestende brand, nie net oor die geboue wat geraak word nie, maar ook oor kunswerke en dokumente. Die partyleier, Pieter Groenewald, sê dit is ‘n onvervangbare nalatenskap en vra dat ondersoek ingestel word.