Botswana het meer as genoeg entstof (dalk te veel)

Botswana het voorraad van meer as 3 miljoen dosisse Covid-entstof met ‘n bevolking van 2,37 miljoen mense. Tot op hede het die land reeds dekking van 45,9 persent ten volle ingeënt en 50,8 persent met een dosis. Die land se permanente sekretaris vir gesondheid Christopher Nyanga sê daar is genoeg entstof vir alle landsburgers oor die ouderdom van 12, sowel as versterkdosisse. Die land het ook entstof vanaf Covax ontvang – net meer as 100 000 dosisse AstraZeneca – en het 500 000 dosisse Moderna-entstof vanaf die VSA bekom deur ‘n bilaterale ooreenkoms.