Reaksie op wysigings aan Suid-Afrika se Koolstofbelastingwet

Suid-Afrika se nasionale tesourie het wysigings aan die Koolstofbelastingwet gepubliseer. Die regulasies maak voorsiening vir die kriteria vir koolstofneutraliteitsprojekte. Die Tesourie sê in ‘n verklaring voorleggings van die publiek is by die nuwe regulasies geïnkorporeer. Die hoof van sakeontwikkeling by Economic Development Solutions, Eckart Zollner, sê die belastingvrye toelaag vir koolstofneutrale projekte help ondernemings om hulle koolstofvrystellings en -belastingverpligting te verminder deur in koolstof-arm projekte te belê. Dr. Peter Cunningham, ‘n Namibiese ekoloog het met Kosmos 94.1 Nuus gepraat.


Duhan van der Merwe draf vandag vir die Britse en Ierse Leeus uit

Duhan van der Merwe se gesin en die inwoners van sy tuisdorp George in die Suid-Kaap kom vandag voor ‘n moeilike keuse te staan wanneer die vleuel vir die Britse en Ierse Leeus uitdraf in die eerste toets teen die Springbokke in Kaapstad. Hy het in 2013 aan die Hoërskool Outeniekwa matriek geskryf. Daarna het hy vir die Blou Bulle en Blitsbokke gespeel voordat hy na Skotland is waar hy op die internasionale rugbytoneel beland het. Van der Merwe se ouers en suster woon steeds op George.


DA gekant teen uitstel van plaaslike verkiesings

Die DA in Suid-Afrika is steeds gekant teen die uitstel van die plaaslike verkiesing in Oktober. Die party sê ook die buurland se Grondwet vereis gereelde vrye en regverdige verkiesings. Die Onafhanklike Verkiesingskommissie het ‘n regsmening van die howe ingewin oor die aanbeveling van die Dikgang Moseneke-ondersoek om die verkiesing tot Februarie aanstaande jaar uit te stel. Siviwe Gwarube van die DA sê die kommissie moet hom hou by die voorgeskrewe tydraamwerk van verkiesings elke vyf jaar soos in die Grondwet voorgeskryf.


Covid-19-inentings-punte is vandag oop

Die Namibiese gesondheidsministerie het bekendgemaak dat die positiewe koers onder die 609 nuwe Covid-19 gevalle 24% is. Die meeste nuwe gevalle is in Otjozondjupa met 15%, gevolg deur Khomas en Erongo met 14% elk. Die herstelkoers staan tans op 79%. Die ministerie het die publiek daarop gewys dat die volgende inentings-punte tot vyf uur vanmiddag oop is. Windhoek sentrale hospitaal, Hosiana kerksaal, NG Kerk Eros se saal, Katutura-oos kiesafdeling se kantore, Windhoek skougronde, Otjimuise kliniek en Khomas Hoogland in die Baumgartsbrunn area se mobiele span.


Nuus van die Olimpiese Spele in Japan

Die Olimpiese Spele in Tokio in Japan is in volle gang met verskeie sportsoorte wat vandag op die program is. Namibië se Maike Diekmann het reeds deurgedring na Maandag se kwarteindronde van die twee kilometer enkelskulroei. Vandag neem Tristan de Lange deel aan die padfietswedren vir mans. Lede van die Suid-Afrikaanse span neem ook vandag aan verskeie sportsoorte by die spele deel. Nic Dlamini, Ryan Gibbons en Stefan de Bod verteenwoordig die buurland in die mans padfietswedren oor 240-kilometer. Die mans hokkiespan meet kragte teen Brittanje in groep-B terwyl die vroue teen Ierland in groep-A te staan kom. Onder die swemmers is Erin Gallagher in laan sewe in die derde uitdun van die vroue 100-meter-vlinderslag.


Vermeende opstoker bly eers agter tralies

‘n Vermeende opstoker van die onlangse geweld in Gauteng in die buurland sal ten minste tot Maandag toegesluit bly ná sy tweede hofverskyning in Westonaria aan die Wes-Rand. Die sewe-en-dertig-jarige Sibusio Mavuso is ‘n week gelede in hegtenis geneem en sou na verwagting om borgtog aansoek doen, maar daar was nie ‘n landdros beskikbaar nie. Hy word gekoppel aan ‘n voorval by ‘n kruidenierswinkel nadat hy glo geweld aangehits het op sosiale media. Drie ander verdagtes wat weens dieselfde aanklagte in hegtenis geneem is, het hierdie week in howe in die provinsie verskyn.


Lekker rugby vandag in Kaapstad

Rugby: Ondersteuners kan nie wag vir sesuur vanaand nie wanneer die Springbokke en die Britse en Ierse Leeus mekaar in die eerste van drie toetse in die Kaapstad-stadion pak. John Smit, wat die Springbokke tydens die Leeus se toer na Suid-Afrika in 2009 gelei het, sê die senuwees en die groot verwagting in die reeks teen die Leeus is onbeskryflik. Die Bokke het die 2009-reeks met 2-1 gewen. Smit het aan die media gesê sommige van die grootste Springbokke het nooit die geleentheid gekry om teen die Leeus te speel nie, wat die kragmetings baie spesiaal maak vir die wat wel die kans kry.