Daar is 449 nuwe Covid-19 gevalle in die land

Die Namibiese gesondheidsministerie het 449 nuwe Covid-19 gevalle in die land bevestig. Windhoek het  73, Oshikuku 63, Oshakati 43, Onandjokwe 26 en Rundu 25. Die res kom landwyd voor. Daar is 30 leerders , 15 gesondheidswerkers 9 onderwysers en 9 studente onder die nuwe gevalle.


Verkeersvolumes neem toe op van die hoofroetes

Verkeersvolumes het volgens die Namibiese verkeersowerhede begin toeneem op veral die roetes van die kus en die noorde van die land na die hoofstad met die laaste vakansiegangers  wat op pad terug huis toe is na die feesseisoen.Hoofinspekteur Rozario Coetzee van die Namibiese polisie se verkeersdepartement het motoriste gemaan om versigtig te bestuur ..   


ANC vra dat die buurland se regering die instel van inentingsmandate vir sekere omgewings en bedrywighede af handel

Die ANC-president Cyril Ramaphosa sê die party doen ‘n beroep op die buurland se regering om ‘n beleid oor die instel van inentingsmandate vir sekere omgewings en bedrywighede af te handel. So ‘n beleid sal ‘n waardevolle toevoeging wees tot die instrumente om Covid-19 te beperk en bestuur. Ramaphosa voeg by die ANC steun ook die beroep wat gedoen is by die Wêreld-handelsorganisasie om tydelik die intellektuele eiendomsreg op Covid-19-inentings en -behandelings te laat vaar.


Spanning tussen die Oekraïne en Rusland bly in die nuus

Die sekretaris-generaal van die Noord-Atlantiese Verdragsorganisasie sê Navo moet gereed wees ingeval die gesprek tussen Rusland en die Weste misluk. Jens Stoltenberg het gepraat te midde van voortslepende spanning op die Oekraïense grens. Buitelandse Sake-ministers van die militêre alliansie het per video-oproep vergader om hulle benadering tot die situasie te bespreek. Die organisasie berei voor vir die eerste Navo-Rusland-beraad hierdie week. Moskou hou vol om troepe op die grens tussen die Oekraïne en Rusland te ontplooi, wat vrese laat onstaan president Vladimir Putin mag die Oekraïne moontlik weer binneval.


Goosen word onder-20 skopafrigter by die Bulls

Rugby: Die president van die Bulls, Willem Strauss, sê die losskakel, Johan Goosen, is as ‘n afrigter by die klub aangestel. Die 29-jarige voormalige Springbok het in Oktober verlede jaar ‘n knie-ligament geskeur. Hy sal na ‘n suksesvolle operasie vir die volgende agt tot nege maande rehabilitasie ondergaan. Goosen sal die Bulls se onder-20 skop-afrigter wees. Strauss het die aanstelling op Twitter bevestig.


Ramaphosa oor wangedrag in die ANC

Die ANC-president Cyril Ramaphosa sê die ANC moet wangedrag deur sommige van sy lede onmiddellik stopsit. Dit moet gebeur terwyl die party ongetwyfeld homself vernuwe en herposisioneer. Hy sê die vernuwing gaan oor die verbetering van die party se vermoë om doeltreffend aandag te gee aan mense se kommer en kwessies, as ‘n beweging en as die regerende party. Ramaphosa voeg by hulle moet ook besef hernuwing en heropbou is ‘n proses waarvoor toegewyd gewerk moet word.


Naomi Osaka het onttrek aan die opwarmingstoernooi vir die Australiese Ope

Tennis: Naomi Osaka het onttrek aan die opwarmingstoernooi vir die Australiese Ope. Die verdedigende kampioen sê haar liggaam het skok opgedoen ná sy haar eerste wedstryde in vier maande gespeel het. Dit volg op haar tranerige vroeë uittrede by die Amerikaanse Ope. Die Japanese ster het daarna ‘n lang blaaskans geneem om persoonlike sake te hanteer. Osaka het op Twitter gesê dit was ‘n moeilike terugkeer en sy wil nie te hard druk met die openings-Grand Slam wat op 17 Januarie begin nie.


21 Mense sterf in verkeersopeenhoping in Pakistan

Ten minste 21 mense het gesterf in ‘n reuse verkeersopeenhoping in Pakistan. Dié verkeersknoop is veroorsaak deur tien-duisende besoekers wat op ‘n heuweldorpie toegesak het om ongewone swaar sneeuval te sien. Die polisie berig ten minste agt mense het in hulle motors verkluim. Die minister van Binnelandse Sake, Sheikh Rashid, sê die weermag is ontplooi om paaie skoon te maak en om duisende wat steeds naby Murree, omtrent 70-kilometer noord-oos van Islamabad vasgevang is, te red.


Meer as 300 miljoen mense het wêreldwyd Covid-19 aangemeld

Die totale aantal Covid-19-gevalle wat wêreldwyd aangemeld is, het die 300-miljoen merk verbygesteek. Die Omikron-variant se vinnige verspreiding het nuwe infeksie-rekords in verskeie lande veroorsaak. Vier-en-dertig lande het hulle grootste aantal weeklikse gevalle sedert die begin van die pandemie aangemeld, insluitend 18 nasies in Europa en sewe in Afrika. AFP berig dit lyk nietemin asof Omikron minder ernstige siekte veroorsaak, vergeleke met sy voorgangers. Die wêreldwye gemiddelde sterftesyfer het met drie-persent afgeneem.