Nog 87 nuwe Covid-19 gevalle in die land bevestig

Die Namibiese gesondheidsministerie het 87 nuwe Covid-19 gevalle in die land bevestig. Windhoek het 15, Eenhana 12, Outapi 7, Onandjokwe 6, Omuthiya 5 en die res is landwyd. Daar is nog 1 470 aktiewe gevalle, 121 373 wat reeds herstel het uit ‘n kumulatiewe totaal van 126 290.


Verstappen weer in die voorste plek

Motorsport: Max Verstappen sal by die Italiaanse Grand Prix in die voorste plek wegspring ten spyte daarvan dat hy in gister se Formule Een-kortresies na Valtteri Bottas geëindig het. Lewis Hamilton se nagmerrie-begin het hom drie plekke gekos, asook waarskynlik die kans om die titel by Monza te wen. Bottas het amptelik die F1 se tweede kortresies ooit na 18 dramatiese rondes gewen. Weens ‘n enjin-straf vir vanmiddag se wedren, skuif hy na agter in die wegspringplekke. Dit het aan Verstappen die onverwagte voorste wegspringplek gegee.


Ramaphosa beplan waarskynlik verslapping in Covid-inperkings in die buurland

President Cyril Ramaphosa gaan na wat berig word waarskynlik verligting vir die gasvryheidbedryf en sakeondernemings in die buurland bring deur die inperking te verslap. Hoewel daar volgens die Suid-Afrikaanse media geen amptlike datum of tyd bekend is nie, het belanghebbendes wat die afgelope week met Ramaphosa vergader het, gesê vlak twee kan dalk so gou as vanaand reeds aangekondig word. Ingeligte bronne meen die aandklokreël gaan verander na tussen elfuur saans en vieruur in die oggend. Die beperkings op die verkoop van alkohol kan ook verslap word.


Die jaarlikse Kanselier Welwillendheidsgholfdag vind op Vrydag 24 September by die Windhoek Golf & Country Club plaas.

Gholfklubs maak weer oop en die Universiteit van Namibië-stigting se jaarlikse Kanselier Welwillendheidsgholfdag vind op Vrydag 24 September by die Windhoek Golf & Country Club plaas. Die jaarlikse byeenkoms het ten doel om fondse in te samel vir die studente finansiële hulpfonds vir studente wat net nie die middele het om hul uitstaande studiegeld af te betaal nie. Bernadette Bock, die stigting se direkteur, het met Kosmos 94.1 Nuus gepraat.


Radioaktiewe stof in renosters se horings gespuit sodat die horings maklik by grensposte opgespoor kan word

Suid-Afrikaanse wetenskaplikes spuit nou radioaktiewe stof in renosters se horings sodat die horings maklik by grensposte opgespoor kan word. Daar is reeds in die eerste ses maande vanjaar 249 renosters in die buurland gestroop.Dis 83 meer as in die eerste helfte van 2020. ‘n Navorser in kernfisika aan die Universiteit van die Witwatersrand, James Larkin, het gesê twee renosters is reeds met nie-radioaktiewe isotope ingespuit. Dit verseker dat die stof nie na die diere se liggame versprei of gesondheidsprobleme vir hulle of mense veroorsaak nie.


Die langste gly-kabel in die wêreld word in die Wes-Kaap ontwikkel

Die Wes-Kaap maak reg om die wêreld se langste gly-kabel bekend te stel. Volgens SA Forest Adventures gaan die ambisieuse projek in die Overberg se berge buite Caledon gestalte kry. Dit is reeds in 2018 goedgekeur en die installasie begin hierdie maand. Die langste gly-kabel is tans in die Verenigde Arabiese Emirate. Dit is 2,8-kilometer lank. Clinton Lerm van SA Forest Adventures sê Caledon se gly-kabel-projek sal na verwagting voor die einde van die jaar klaar wees.


Volgens berigte het president Ramaphosa die groenlig gegee vir Zuma se parool

President Cyril Ramaphosa het na bewering die Suid-Afrikaanse nasionale kommissaris van korrektiewe dienste, Arthur Fraser, die groen lig gegee om die vrylating van oudpresident Jacob Zuma op omstrede paroolgronde toe te laat. Dit is volgens twee bronne wat aan die media in die buurland gesê het dat die gevangenishoof die president geraadpleeg het voordat hy besluit het om Zuma vry te laat op grond van drie mediese assesserings.


Die Springbokke is reg vir die Wallabies vandag

Rugby: Die Springbokkaptein Siya Kolisi sê hulle is opgewonde oor vanmiddag se Kampioenskaps-wedstryd teen die Wallabies in Queensland. Die wêreldkampioene wil nie net hulle rekord van agt jaar sonder ‘n oorwinning in Australië uitwis nie, maar ook seker maak hulle bly op koers met die verdediging van hulle titel. Kolisi sê die Bokke vertrou hulle verdediging. Die Suid-Afrikaners het sedert 1992 nog net vyf wedstryde in Australië gewen. Maar die meeste kenners meen die Springbokke het wat nodig is om te wen. Afskoptyd is net na twaalf vanmiddag Namibiese tyd.