Die wenners van die Wêreldreis-toekennings vir 2021 is bekend

Shipwreck Lodge langs die Skedelkus is vir drie agtereenvolgende jare vir die Wêredreis-toekenning genomineer. Vanjaar het die spoglodge met die louere weggeloop as Namibië se luuksste safari lodge vir 2021. Die ander wenners in Namibië is Sandfontein Lodge en Natuurreservaat as die beste safari lodge, Wilderness Safaris se Hoanib Skeleton Coast Lodge as die beste safari-tentkamp, Avani Hotel die beste hotel, Hertz as die beste voertuigverhuringsmaatskappy en Namibia Tours & Safaris as die beste toeroperateur. Nrupesh Soni, Namibiese toerisme-kenner, reageer op hierdie prestasies.

Soni het ook gesê wat die oorwinning van die Eagles by die T20 Krieketwêreldbeker vir die toerismebedryf beteken.


Leerlooiery-bedryf moet in Namibië herstel word

Die Namibiese landbouministerie hou vandag slypskole met die streeksleierskap van Kavango-Oos. Die uitvoerende direkteur in die landbouministerie, Percy Misika, het gesê die leerlooiery-bedryf moet in die land herstel word. In sy toespraak wat deur direkteur Mesag Mulunga voorgelees is, sê hy die bedryf hang af van die voorraad van velle en huide wat deur veeprodusente verskaf word.


87 verdagtes hof toe na dodelike skietgeveg in Noordwes

Altesaam 87 verdagtes gaan Maandag in Orkney, Noordwes, in die hof verskyn op aanklag van moord en die onwettige besit van goud en vuurwapens. Hulle is in hegtenis geneem na ‘n skietgeveg waarin ses mense dood en agt gewond is. Die Valke in die provinsie het inligting ontvang oor onwettige mybedrywighede en is met geweervuur begroet toe hulle by die skag opgedaag het. Een van die Valke is gewond. Die span het beslag gelê op twee minibusse, onwettige myntoerusting en gouddraende materiaal. 


Mathews Phosa gaan Carl Niehaus verdedig

Die ANC-staatmaker Mathews Phosa gaan Carl Niehaus verteenwoordig in sy poging om weer in sy pos in die kantoor van die sekretaris-generaal aangestel te word. Die ANC se hoofbestuurder, Febe Potgieter, het Niehaus vroeër in kennis gestel dat sy appèl volgende maand aangehoor word en hy moet verteenwoordig word deur ‘n partylid. Niehaus is verlede maand afgedank nadat hy aanklagte van diefstal, bedrog en korrupsie teen die ANC-leierskap aanhangig gemaak het omdat salarisse en voordele nie betaal word nie. Die appèl sal deur advokaat Greg Fouré aangehoor word. 


Een Covid-sterfte van kind aangemeld

Die Namibiese gesondheidsministerie het een Covid-sterfte van ‘n kind by Outapi aangemeld, asook 30 nuwe gevalle uit 1 157 toetsuitslae wat ‘n positiewe koers van 2,6 persent verteenwoordig. In die groep is tien leerders van verskillende skole, twee studente en een onderwyser. Daar is nou 868 aktiewe gevalle, waarvan 49 in hospitale is, en vier in intensiewesorgeenehede. Altesaam 241 224 mense is nou ten volle ingeënt. 


ActionSA verloor stembriefsaak in Kieshof

ActionSA het sy stryd verloor om sy naam op die stembrief langs sy kenteken te kry toe die Kieshof teen die party beslis het. ActionSA se president, Herman Mashaba, sê hoewel die party teleurgesteld is, respekteer hy die beslissing. Nasionale woordvoerder Lerato Ngobeni sê hulle gaan nou fokus op die buitengewone maatreëls wat getref moet word om te verseker kiesers kan die party op die stembrief opspoor in volgende maand se verkiesing.


Tshwane kry dringende interdik teen munisipale vakbond

Tshwane se burgemeester, Randall Williams, het die metro se regspan opdrag gegee om ‘n dringende interdik te kry teen die munisipale vakbond, Samwu. Dit volg nadat lede dienste en dienslewering ontwrig het. Die stad se woordvoerder, Sipho Stuurman, sê dis teleurstellend dat daar steeds Samwu-lede is wat kies om die munisipaliteit se werk te ontwrig, al gee die metro aandag aan salarisverhogings.


Landbouministerie hou slypskole in Kavango-Oos

Die Namibiese landbouministerie hou vandag slypskole met die streeksleierskap van Kavango-Oos. Boere in die streek het verskeie uitdagings, soos swak paaie. Daar is ook die kwessie oor die veeartseny kordonheining. Damian Maghambayi, raadslid van die Mukwe-kiesafdeling en die voorsitter van die streeksraad van Kavango-Oos, sê namens die goewerneur, Bonifatius Wakudumo, wat hul uitdagings is.


Agri SA sê stygende insetkoste knel voedselproduksie

Agri SA sê stygende insetkoste, soos noodsaaklike landbou-produksie-insette, arbeid en ander oorhoofse uitgawes is ‘n groot uitdaging vir voedselproduksie in Suid-Afrika. Die koste van kunsmis, onkruiddoders, verpakking, diesel, elektrisiteit en arbeid neem vinnig toe, wat dit vir baie boere bykans onmoontlik maak om voedsel volhoubaar te produseer. Die uitvoerende direkteur van Agri SA, Christo van der Rheede, sê ‘n onlangse studie deur die Buro vir Voedsel en Landboubeleid toon dat die koste van kunsmis vir graan en oliesaadproduksie in Suid-Afrika die derde hoogste ter wêreld is.


Numsa hou betoging teen polisiewreedheid

Die metaalwerkersvakbond in die buurland, Numsa, sal vandag ‘n klagskrif aan die Germistonse polisiekantoor in Ekurhuleni oorhandig. Dit volg nadat die polisie op die 11 Oktober by die Fuzile Khesa-saal in Germiston met rubberkoeëls op vakbondlede geskiet het. Numsa se nasionale woordvoerder, Phakamile Hlubi-Majola, sê die lede het vroeër aan die ingenieurstaking deelgeneem, maar tydens die skietery was ‘n loonooreenkoms reeds bereik.