Aussie-polisie betrap ontvoerders, vas aan die slaap in voertuig

Die polisie in Australië het twee vermeende ontvoerders gearresteer nadat hulle gevind is in hul voertuig, vas aan die slaap. Die mans het na bewering ‘n man en ‘n vrou in Brisbane, Queensland, vroeg Vrydagoggend gedreig en ontvoer. Beamptes sê hulle het ook verskeie items in die voertuig gevind, insluitend ritsbande, bleikmiddel, ystersaaglemme, draadknippe, asook kontant en dwelms. Die slagoffers is na bewering sowat 80 kilometer Suid geneem na ‘n Gold Coast-voorstad, waar die voertuig by ‘n parkeerterrein stilgehou het. Die twee het uit die voertuig ontsnap en die polisie ontbied. Beamptes het die twee mans aan die slaap in die voertuig gevind, oënskynlik onbewus daarvan dat hul slagoffers ontsnap het.