Rusland beplan geen skietstilstand oor Kersfees

Rusland sê hy het nog geen voorstelle ontvang oor ‘n skietstilstand oor Kersfees in Oekraïne nie. President Volodimir Zelensky het dié week ‘n beroep op Moskou gedoen om teen Kersfees sy magte uit die land te begin onttrek as die eerste deel van ‘n vredesooreenkoms ná byna 10 maande van oorlog. Die Kremlin se woordvoerder, Dmitry Peskov, sê daar sal geen vrede met Kiëf wees voordat Zelensky die werklikheid aanvaar dat Rusland beheer het oor vier Oekraïnse streke wat hy ná referendums in September geannekseer het nie.