Man met kruisboog by Windsor-kasteel gearresteer

Britse polisie het ‘n man in hegtenis geneem wat daarvan verdink word dat hy by die terrein van Windsor-kasteel, waar koningin Elizabeth Kersfees deurbring, ingebreek het. Volgens berigte het hy ‘n kruisboog by hom gehad. Die 19-jarige man is gearresteer vir beweerde inbraak, betreding van ‘n beskermde terrein en besit van ‘n gevaarlike wapen. Britse media sê kringtelevisie-operateurs het die man opgemerk met ‘n item wat soos ‘n kruisboog gelyk het. Die man het volgens berigte ‘n touleer gebruik om oor ‘n heining te klim.