Jacob Zuma in Gautengse hospitaal opgeneem

Suid-Afrikaanse oudpresident Jacob Zuma is in die hospitaal in Gauteng opgeneem. Sy broer, Khanya, het bevestig dit is vir ‘n roetine-ondersoek. Die woordvoerder van die departement van korrektiewe dienste, Singabakho Nxumalo, kon nie bevestig dat Zuma opgeneem is nie. Zuma is in Augustus, kort nadat hy sy tronkstraf van 15 maande by die Estcourt Korrektiewe Sentrum begin uitdien het weens minagting van die hof, in ‘n militêre hospitaal opgeneem vir mediese behandeling. Die departement van korrektiewe dienste het mediese parool aan hom toegestaan weens ‘n siekte wat nie bekend gemaak is nie.