Esau nóg ‘n Kersfees agter tralies saam met Fishrot-lot

Die Fishrot-beskuldigde en voormalige  minister van visserye en mariene hulpbronne, Bernhardt Esau, gaan nóg ‘n Kersfees agter tralies saam met sy mede-beskuldigdes deurbring. Regter David Munsu het Esau se borgtogverhoor in die Windhoekse hoërhof tot 27 Februarie volgende jaar verdaag. Sou die borgtogverhoor voortgaan, sal dit weer op 3 Maart en dan vanaf 10 tot 14 April 2023 aangehoor word. Indien dit weer uitgestel word, sal dit vanaf 22 tot 24 Mei 2023 voortgesit kan word. Esau het getuig hy voel verraai deur sy medebeskuldigdes, omdat hulle hom by ‘n beweerde kriminele sindikaat ingesleep het waarby hy nie ‘n enkele sent baat gevind het nie. Esau het vasbeslote getuig dat alles wat hy met betrekking tot visvang-transaksies tydens sy ampstermyn as minister gedoen het, wettig was en aan hom gedelegeer is.