Max Verstappen van Red Bull is in die voorste wegspringposisie in vandag se Miami Grand Prix, nadat hy Saterdag die snelren gewen het. Daar word berig die wêreldkampioen en kampioenskap-voorloper, wat dié seisoen vier van die vyf Grand Prix-wedrenne ingepalm het, het nou sy sewende agtereenvolgende voorste wegspringposisie behaal. Charles Leclerc van Ferrari spring tweede weg, met sy spanmaat Carlos Sainz derde, en Verstappen se Red Bull-spanmaat Sergio Perez vierde. Die drie-malige wêreldkampioen Verstappen het die vorige twee Grands Prix in Miami gewen, maar nog nooit vanuit die voorste wegspringposisie nie.