Bryant se weduwee kry N$270m in skadevergoeding

‘n Jurie het die weduwee van die NBA-superster, Kobe Bryant, skadevergoeding van 270 miljoen Namibiese dollar toegeken vir uitgelekte foto’s van die helikopterongeluk waarin haar man, dogter en sewe ander in 2020 dood is. Vanessa Bryant het ‘n regsgeding teen Los Angeles-distrik aanhangig gemaak. Die jurie het gehoor polisie en brandbestryders het grusame selfoonfoto’s by die ongelukstoneel geneem en dit aan ander gewys, onder meer by ‘n kroeg en by ‘n glansgeleentheid. Bryant se prokureur, Luis Li, sê die nabyfoto’s het geen amptelike of ondersoekende doel gehad nie en is uit grusame nuuskierigheid rondgewys.