Rugby: Naelbyt-wedstryd tussen United en Wanderers

Rugby: Trustco United en FNB Wanderers het nog ‘n naelbyt-wedstryd opgelewer met ses drieë elk, voordat United uiteindelik ‘n beslissende laat drie gedruk het om met 46-38 op Gemsbokpark in Windhoek te seëvier. Wanderers staan hiermee hul onoorwonne rekord hierdie seisoen in hul 13de wedstryd af, maar bly bo-aan die punteleer van die Namibiese Rugby-unie se premierliga. Met een ronde oor volgende Saterdag, skuif United se oorwinning hulle tot net een punt agter die tweede geplaaste FNB Kudus. FNB Unam het FNB Kudus op die Jan Wilken-stadion in Walvisbaai met 20-13 geklop.