Los Angeles-inwoners los motors, hardloop weg van veldbrand

Gillende inwoners van Los Angeles het hul motors agtergelaat om weg te kom van ʼn veldbrand wat baie vinnig op ʼn skilderagtige enklawe van bekendes afgepyl het. ’n Tierende wind het binne ’n kwessie van ʼn paar uur ’n skynbaar doodgewone veldbrand in ’n verwoede inferno omskep en die brand na die gebied rondom Pacific Palisades versprei. Dertig-duisend mense is aangesê om te ontruim. Daar was spoedig verkeersopeenhopings op die belangrikste pad in die gebied, die Pacific Coast Highway, sodat baie motoriste hul voertuie naby Sunset Boulevard gelos en te voet gevlug het.