Britse atleet op Tafelberg aangeval

Die Britse professionele landloopatleet Tom Evans is op ‘n staproete op Tafelberg beroof, met ‘n mes aangehou en aangerand. Die 31-jarige Evans was in die Moederstad om te oefen vir volgende naweek se gewilde RMB Ultra-roete Kaapstad. Evans se trouring, foon en horlosie is gesteel. In ‘n video wat op sosiale media geplaas is, sê Evans aan sy 60 000 ondersteuners hy is “platgeslaan” dat hy nie meer aan die byeenkoms kan deelneem nie, en wens die hardlopers wat nog in Kaapstad is “alles van die beste” toe in die dae voor die geleentheid.