Will Smith berei voor om nuwe album vry te stelMarch 18, 2025

Will Smith is gereed om sy eerste nuwe album in meer as 20 jaar vry te stel. Die rapper, wat vir twee dekades afwesig was van die musiektoneel, beplan ’n groot terugkeer met Based on a True Story. Dit is sy eerste album sedert Lost and Found in 2005, en dit gaan op 28 Maart verskyn. Hy het op Instagram aangekondig: “Dis AMPTELIK!! My nuwe album ‘Based On A True Story’ verskyn op 28 Maart. TWEE WEKE!! Ek werk al ’n tyd lank aan hierdie projek en ek kan nie wag om dit met julle te deel nie.”

Die album sluit enkelsnitte in soos First Love, Beautiful Scars, TANTRUM, Work of Art en You Can Make It. Dit bevat ook samewerkings met DJ Jazzy Jeff, Teyana Taylor en Jac Ross.
Will Smith het voorheen erken dat sy terugkeer na musiek deels geïnspireer is deur die omstredenheid by die 2022 Oscar-toekennings. Hy het die verhoog bestorm en die gasheer, Chris Rock, geklap net voordat hy die Oscar vir beste akteur vir King Richard ontvang het.

In ‘n onderhoud met Billboard het hy gesê: “Daar het ’n diep put van begrip van kuns en pyn binne my oopgegaan … dinge waarvan ek nie eens bewus was nie. Ná die Oscars het daardie geestelike reis voortgeduur en ’n wêreld binne my wakker gemaak waarvan ek nie geweet het nie. “Ek het drome en visioene gehad; dele van my innerlike landskap waarvan ek nooit bewus was nie. Dit het iets in my laat borrel om te deel wat ek sien en ervaar, en om dit musikaal te verken. ’n Groot deel van my musiek gaan nou daaroor om die ekstase en vreugde wat ek as kind in die kerk ervaar het, terug te bring. Dit gaan oor die poging om hierdie wêreld draagliker te maak.

“Ek het nog altyd ’n wilde verbeelding gehad; dis deel van wie ek is. Maar nou is daar iets nuuts wat vereis dat ek dit deur musiek uitdruk.” Will het ook laat blyk dat Based on a True Story die eerste album van ’n trilogie is, wat hy vergelyk met “drie seisoene van ‘n TV-musiekprogram”.

Foto verskaf