Kyk oos om komeet Atlas te sien

’n Helder komeet kan oor die komende dae vir die eerste keer in 160 000 jaar regoor die aardbol sigbaar wees. Nasa sê die toekomstige helderheid van ‘n komeet is moeilik om te voorspel, maar dat komeet C/2024 G3, of Atlas, helder genoeg kan bly om met die blote oog gesien te word. Maandag was die komeet by perihelium, die punt waarop dit die naaste aan die Son is, wat beïnvloed hoe helder dit is. Terwyl die presiese liggings vir moontlike sigbaarheid onbekend is, meen kenners die komeet, wat so helder soos Venus kan skyn, sal die beste vanaf die suidelike halfrond waargeneem kan word. Mense in die suidelike halfrond moet na die oostelike horison kyk voor sonsopkoms, en na die westelike horison na sonsondergang.