Becoming Led Zeppelin kom na IMAX op 5 en 6 Februarie en in fliekteaters en IMAX vanaf 7 Februarie

Becoming Led Zeppelin is ‘n amptelike dokumentêr wat die oorsprong en vinnige sukses van die legendariese rockgroep Led Zeppelin ondersoek. Die film word op 5 en 6 Februarie op IMAX vrygestel en sal vanaf 7 Februarie in fliekteaters en IMAX vertoon word. Kaartjies sal vanaf 17 Januarie beskikbaar wees.
Hierdie dokumentêr, geregisseer deur Bernard MacMahon, neem kykers op ‘n visueel indrukwekkende reis deur die musiekgroep se vroeë dae. Met seldsame, psigedeliese beeldmateriaal en opwindende optredes, bied die film ‘n unieke blik op Led Zeppelin se kreatiewe, musikale en persoonlike ontwikkeling. Dit is die eerste dokumentêr wat amptelik deur die groep goedgekeur is en die verhaal word deur die lede self vertel.
Die film ondersoek die individuele musikale invloede en loopbane van elke groep-lid voor die stigting van Led Zeppelin. Daarna word daar gefokus op hul eerste twee albums en hul vroeë wêreldtoere. Die dokumentêr bevat eksklusiewe, nog nooit tevore gesiene beeldmateriaal, asook oudiogrepe van die oorlede tromspeler John Bonham wat dekades lank privaat gehou is. Volledige liedjies word in die film gespeel, wat dit ‘n konsertagtige ervaring gee.
Becoming Led Zeppelin bied aanhangers ‘n diepgaande en energieke blik op die ontstaan van een van die invloedrykste rockgroepe in die musiekgeskiedenis.

Foto verskaf