Wonderwerk-baba wat Van Reenenspas-botsing oorleef, se familie gevind

Die LUR vir Vervoer en Menslike Nedersettings in KwaZulu-Natal, Siboniso Duma sê die wonderwerk-baba, wat ‘n gru-ongeluk oorleef het, se familie is in Gauteng gevind. Sewentien mense het gesterf in die ongeluk tussen ‘n vragmotor en ‘n minibustaxi op die Van Reenenspas. Die LUR se woordvoerder, Ndabezinhle Sibiya, sê die baba se naasbestaandes is opgespoor en woon tans in Tembisa, Ekurhuleni. Hy sê sy het saam met haar grootouers gereis. Die grootouers en vier ander familielede het in die botsing gesterf.