Na 72 jaar vind boek pad terug biblioteek toe

Die openbare biblioteek in New York het die terugkeer van Igor Stravinsky se 1936 outobiografie gevier, 72 jaar nadat dit laas uitgeneem is. Billy Parrott, direkteur van die Stavros Niarchos Foundation Library, het gesê hy het ‘n paar dae voor Kersfees ‘n oproep van die biblioteek se 5th Avenue-tak ontvang. Die boek is op 4 April 1952 uitgeneem en moes twee weke later terug wees, maar is eers onlangs teruggebring.

“Ons kry gereeld goed terug van die ’80’s of die ’90’s, maar selde uit die middel van die eeu,” het Parrott gesê. Die boek is teruggebring deur ‘n man wat gesê het sy ma het dit in die 1950’s uitgeneem terwyl sy musiek aan Hunter College gestudeer het. Sy het die boek nooit teruggebring nie, selfs al het sy later by ‘n ander biblioteek in die Bronx gewerk.

Parrott het gesê die boek sal nie weer in sirkulasie wees nie, maar sal vir die “nuuskierigheid en storie” behou word. Die biblioteek het foto’s van die langverlore boek op Instagram gedeel, met die vraag of iemand ‘n kopie van die boek het wat 72 jaar oor die sperdatum is, en herinner dat die biblioteek sedert 2021 boetevry is.