Liverpool se Slot loop katvoet vir sukkelende Manchester United

Arne Slot sê die beleërde Manchester United is “baie, baie beter” as wat hulle skokkende plek in die Premierliga tans aandui, terwyl hy Liverpool voorberei vir hulle kragmeting môre teen hulle aartsvyande. Liverpool loop heel boaan die puntetabel van die Premierliga met ses punte voor en is die algehele gunsteling om hulle 20ste titel in die strafste Engelse kompetisie te behaal, wat hulle gelyk sal laat trek met die rekordhouers, United. Daarteenoor is United 14de op die puntetabel na vyf nederlae in hulle laaste ses kragmetings met nuwe hoofafrigter, Ruben Amorim.