DRK lê doodstraf vir 13 soldate op

’n Kongolese militêre tribunaal het 13 soldate ter dood veroordeel op aanklagte van onder meer moord, plundering en lafhartigheid in wat militêre owerhede sê ’n poging is om weermagdissipline te verbeter ná territoriale verliese weens soldate wat gevlug het. Die soldate is gevonnis in die dorp Lubero in die Demokratiese Republiek van die Kongo se oostelike Noord-Kivu-provinsie, waar Kongolese magte al byna drie jaar lank die Rwanda-gesteunde M23-opstand beveg, asook ander burgermaggeweld in die gesig staar. Altesaam 24 soldate het tereggestaan. Benewens dié wat doodstraf opgelê is, het vier vonnisse van twee tot 10 jaar gekry, ses is vrygespreek en een se saak is vir verdere ondersoek uitgestel.