En die vetste beer is …

Wanneer dit kom by kilogramme opstapel om ‘n Alaska-winter te oorleef, is Grazer vanjaar se onbetwiste kampioen. Grazer, ook bekend as Beer 128 vir die aanhangers van die Vet Beer-week in Alaska se Katmai Nasionale Park, het vanjaar se kompetisie gemaklik gewen. Sy het vyf keer meer stemme gekry as haar naaste teenstander. Die jaarlikse kompetisie, wat vanjaar meer as 1,3 miljoen stemme getrek het van toegewyde aanhangers wat die bere regstreeks by explore.org dophou, is ‘n manier om die veerkragtigheid van die bruinbere te vier. Kykers van Alaska se gewildste realiteitskompetisie sit die hele somer voor rekenaarskerms vasgenael om te sien watter bere die meeste salm vang.