Otavi pa wat blykbaar sy seun, 2, vermoor weer in hof

Die 28-jarige man wat van die moord op sy biologiese seun in Otavi aangekla word, sal weer vandag in die hof op die dorp verskyn na sy saak einde Augustus uitgestel is sodat hy regsverdediging kan bekom en die polisie sy ondersoek kan voltooi. Thomas Muronga word daarvan aangekla dat hy sy tweejarige seun, Jason, noodlottig beseer het. Hy het na bewering die kind met geweld by sy 24-jarige meisie, wat ook die baba se ma is, geneem en toe na ‘n spoorlyn in die dorp gery. Daar, word beweer, het hy die kind se kop twee keer teen betonpale geslaan. Jason is dieselfde dag in die Otjiwarongo-staatshospitaal aan ernstige kopbeserings dood. Muronga word aangekla van een aanklag van moord en nog een van aanranding, met laasgenoemde wat spruit uit ‘n voorval waar hy ‘n polisiebeampte met ‘n mes gesteek het tydens sy arrestasie.