Wimbledon: Verrassing-oorwinning veroorsaak noodreëlings vir kat Frankie se sorgJuly 15, 2023

Die Tsjeggiese speler Markéta Vondroušová het met ʼn ander probleem te doen gekry toe sy teen die verwagting in vir die vroue-eindstryd op Wimbledon gekwalifiseer het. Die ongekeurde speler het nie daarvan gedroom om om die titel te speel nie en was net so verbaas soos enigiemand anders toe sy Elina Svitolina van Oekraïne in die halfeindronde getroef het. Vondroušová moes toe inderhaas iemand vind om na haar Sphynx-kat, Frankie, om te sien, sodat haar man en suster, wat die kat tuis versorg het, na Engeland kon vlieg om haar vanmiddag te ondersteun. Sy speel teen Ons Jabeur van Tunisië.