Tenders vir spyseniering van Heldedag op die nippertjie uitgereik

Die kantoor van die eerste minister het volgens die Tender Bulletin slegs twee dae kennis gegee vir die tender vir die spyseniering vir 20 000 persone, asook 3 000 Baie Belangrike Persone vir die 33ste Heldedag-herdenking in Windhoek. Verskeie spyseniers moes die voorbereiding van kos deel, wat afsonderlik verskaf word, maar daar was geen openbare tender vir die voorsiening van die kos of die middagete-tent nie. Heldedag-vieringe sou aanvanklik op Omuthiya in die Oshikoto-streek plaasgevind het, waar drie osse onder meer op die spyskaart was. In die Ohangwena-streek het vieringe by vier nedersettings plaasgevind met drie bokke wat in twee nedersettings geslag moes word. Die ander twee nedersettings moes met rys, pasta, pap, groente en koeldrank tevrede wees.