Stormers, Bulle teken oorwinnings aan

Die Stormers het daarin geslaag om ‘n agterstand teen Stade Francais in Parys op die nippertjie in ‘n oorwinning om te keer om so ‘n tuis-uitspeelwedstryd in die Kampioene-beker te verseker. ‘n Drie deur Manie Libbok in die 71ste minuut, in sy 50ste wedstryd vir die Stormers, het aan die span ‘n bonuspuntoorwinning van 24-20 by die Stade Jean-Bouin besorg. Marcell Coetzee het vroeër in die Bulle se opwindende kragmeting teen die Bordeaux Begles op Loftus twee drieë ingeryg wat gehelp het om hulle ‘n bonuspunt-oorwinning van 46-40 te gee. Hulle kwalifiseer nou ook vir die uitspeelfase. Die twee spanne het elk ses drieë in die wedstryd gedruk.