Spoedvrate in Oostenryk – motor kwyt as jy gevang word

‘n Nuwe wet laat die regering toe om beslag te lê op voertuie van diegene wat 60 kilometer per uur of meer oor die spoedgrens ry.

Soos die VSA, het Oostenryk ‘n onlangse toename in padsterftes gesien. Maar paaie is baie veiliger in die Europa as in die VSA. In die VSA het padsterftes onlangs ook toegeneem – in 2021 het padsterftes ‘n hoogtepunt in 16 jaar bereik, en in 2023 was sterftes 13,6% hoër as in 2019.

Oostenryk se direkteur-generaal van vervoer, Vera Hofbauer, het aan internasionale media gesê die nuwe wet is nie lank genoeg op die boeke om die impak daarvan te meet nie, maar die positiewe invloed daarvan word reeds gevoel. Net ure nadat die wet in werking getree het, het die regering hul eerste beslaglegging uitgevoer.

Oostenryk het 4,1 padsterftes vir elke 100 000 mense in 2022 ervaar. Hofbauer het aangevoer dat “drastiese maatreëls” in plek gestel moes word om bestuurders te keer wat “hul motor soos ‘n wapen gebruik”.

 Oostenryk is nie al een wat hom toespits op padveiligheid nie. ’n Klomp Europese lande het die wêreld se strengste padveiligheidsregulasies geïmplementeer. In verskeie lande word spoedkaartjies bereken op grond van die bestuurder se inkomste, dus hoe ryker die bestuurder is, hoe steiler die boete.

In Switserland word spoedkaartjies op grond van beide inkomste en rykdom bereken sedert 2007. Een bestuurder is in 2010 met meer as US$1 miljoen beboet omdat hy sy sportmotor 290km/uur in ‘n 120 km/uur-sone gery het.

Verlede jaar in Finland is ‘n multimiljoenêr met ‘n €121 000-kaartjie beboet – sowat N$2,3 miljoen – omdat hy ongeveer 79km/uur in ‘n 50 km/uur-sone gery het.