Paaltjies kantel op eerste dag van Australië-Indië toets

Krieket: Gashere Australië hervat môre hulle eerste beurt op 67 vir sewe na ʼn eerste dag met lae tellings in die eerste toets teen Indië in Perth. Indië se waarnemende kaptein, Jasprit Bumrah, het die loot gewen en besluit om eerste te kolf maar die paaltjies het feitlik onmiddellik begin kantel en sy span is vir net 150 uitgehaal. Nitish Kumar Reddy het die hoogste telling aangeteken met 41 en Josh Hazlewood het vier paaltjies geneem. Maar Australië het nog treuriger begin en teen uitskeityd was Alex Carey se onoorwonne 19 die hoogste telling. Bumrah het vier paaltjies ingeoes.