Opkomende gholfspeler veg om sy oog te behou

ŉ Opkomende Australiese gholfspeler wat vandeesmaand sy debuut in die Amerikaanse PGA-toer gemaak het, veg om sig in sy oog te behou nadat ŉ bal hom tydens ŉ pro-am-toernooi getref het. Die 20-jarige Jeffrey Guan is by ŉ toernooi naby Sydney in die gesig getref en per lug na die hospitaal gehaas vir ŉ operasie. Guan het onlangs ŉ ooreenkoms onderteken met dieselfde bestuursmaatskappy wat die major-wenners Jon Rahm en Phil Mickelson verteenwoordig. Hy het ŉ borgskap-uitnodiging ontvang na die PGA-toer se Procore-kampioenskap wat hierdie maand in Kalifornië plaasvind.