Nuwe parkeringtariewe vandag in Whk van krag

Motoriste in Windhoek sal vanaf vandag meer vir parkering in sekere strate in die hoofstad moet betaal. Dit volg na Stad Windhoek in Maart vanjaar twee privaat maatskappye, KeyPlot Investments en ChargeTech Namibia, aangestel het om parkering in die sentrale sakekern te bestuur. Afhangende waar parkering bekom word kan dit enigiets van 3 Namibiese dollar per uur kos, tot soveel as 8 dollar per uur. Stad Windhoek sê die sakekern is op die oomblik vol en dit dra by tot tekorte in beskikbare parkering. Die nuwe tariewe is Maandag tot Vrydag vanaf ses-uur soggens tot ses-uur namiddag en Saterdae vanaf ses-uur soggens tot twee-uur namiddag geldig. Die strate wat geraak word, is Robert Mugabe-rylaan, Julius Nyerere-straat, Mandume Ndemufayo-rylaan en professor Mburumba Kerina-straat.