Israel vra nog Rafah-gebiede om te ontruim

Israel doen ‘n beroep op Palestyne in meer gebiede van die Gaza-stad Rafah om te ontruim. Hulle moet gaan na wat Israel ‘n uitgebreide humanitêre gebied in Al-Mawasi noem. In ‘n plasing op X het ‘n militêre woordvoerder ook ‘n beroep op inwoners en ontheemdes in die Jabalia-gebied in die noorde van Gaza, en 11 ander woonbuurte in die enklawe gedoen om onmiddellik na die skuilings wes van Gazastad te gaan. Volgens die Palestynse nuusagentskap WAFA is 24 Palestyne oornag dood nadat Israeliese stralers verskeie gebiede in sentraal Gaza geteiken het. Ten spyte van swaar Amerikaanse druk, het Israel gesê hulle sal voortgaan met ‘n inval in Rafah.