Geweld in Gaza, Rooisee duur voort

Gesprekke oor ‘n wapenstilstand en gyselaarswisseling tussen Israel en Hamas is in ‘n doodloopstraat. ’n Bron sê Israel bly weg van die Kaïro-samesprekings omdat Hamas weier om ’n lys van gyselaars te verskaf wat nog lewe. Hamas sê dit is onmoontlik sonder ‘n wapenstilstand aangesien gyselaars oor die oorlogsone versprei is. Gesondheidsamptenare in Gaza het die afgelope 24 uur 86 sterftes aangemeld en getuies sê Israeliese bombardemente duur voort in dele van Khan Younis, die suidelike stad Rafah en gebiede in sentraal Gaza. In die jongste aanval in die Rooisee is ‘n handelsvaartuig Woensdag suid van Jemen beskadig. ‘n Skeepsbron sê drie bemanningslede is dood, vier ander het ernstige brandwonde opgedoen en dit lyk of die vaartuig verlaat is.