Drie Chinese op Otjiwarongo van kontant, selfone beroof

Drie Chinese burgers tussen 28 en 32 jaar oud is vanoggend op Otjiwarongo beroof. Na bewering het vier onbekende mans ‘n venster gebreek en by die huis ingekom waar die drie Chinese woon. Hulle is met skoenveters vasgebind en twee van hulle is met ‘n kombers toegemaak. Die verdagtes was glo met twee pistole gewapen en twee van hulle het maskers gedra. Nie een van die slagoffers het ernstige beserings opgedoen nie, behalwe kneusplekke aan hul arms. Die verdagtes het weggekom met kontant van tussen 50 000 en 60 000 Namibiese dollar en vier selfone. Volgens die Namibiese polisie is die verdagtes nog op vrye voet.