China het pas ‘n groot stap geneem in sy tegnologiese mededinging met die Verenigde State deur die bou van ’n superrekenaarnetwerk in die ruimte aan te pak. Volgens die staatsbeheerde China Aerospace Science and Technology Corporation is 12 satelliete op 14 Mei suksesvol gelanseer vanaf die Jiuquan Satelliet-lanseer Sentrum in Noord-China met ’n Long March 2D-vuurpyl. Hierdie satelliete vorm deel van die “Star Computing”-program en is ontwikkel deur Guoxing Aerospace Corporation.
Die nuwe ruimteberekeningskonstellasie is bedoel om ‘n onafhanklike rekenaarnetwerk in ‘n wentelbaan te skep, wat nie op Aarde-gebaseerde verbindings staatmaak nie. Dit bied groot voordele: Dit vermy die behoefte aan duur verkoelingstelsels en is minder kwesbaar tydens konflik. Die plan is om uiteindelik 2 800 satelliete te hê wat met lasers verbind is in ‘n enkele netwerk.
Hierdie ontwikkeling wys duidelik China se intensiewe fokus op kunsmatige intelligensie en ruimterekenaars. Volgens die ST Daily, die amptelike koerant van die Chinese Ministerie van Wetenskap en Tegnologie, sal hierdie netwerk voorsiening maak vir die toenemende vraag na intydse rekenaars in die ruimte.
China hoop om die wêreldleier te word in die bou van ‘n globale ruimterekenaarinfrastruktuur.
Ter vergelyking het Elon Musk se Starlink-stelsel reeds meer as 6 750 satelliete in ‘n wentelbaan, met die doel om tot 30 000 uit te brei. Alhoewel China se getalle tans kleiner is, dui die ambisie en tegnologiese innovasie op ’n strategiese skuif.
Jonathan McDowell van Harvard Universiteit het gesê dat datasentrums in ’n wentelbaan sonkrag kan gebruik en hul hitte direk na die ruimte kan uitstraal, wat energiekoste en die koolstofvoetspoor verminder.China se planne dui op verskerpte navorsing om die VSA in hoëspoedrekenaars, KI en ruimtetegnologieë te oortref. Die ruimtewedywering tussen die twee moondhede neem vinnig toe.
Foto verskaf