Vermeende sinkplaatdief se wegkom-voertuig is ‘n donkiekar

‘n Vermeende sinkplaat-dief op ‘n donkiekar verskyn vandag in die Okahandja-landdroshof. Volgens die Namibiese polisie se misdaadverslag het die 33-jarige verdagte glo die sinkplate gesteel nadat hy by ‘n huis ingebreek het. Die voorval het in die Okandjira-nedersetting naby Ovitoto in die Otjozondjupa-streek plaasgevind. Hy het glo die sinkplate ter waarde van 3 900 Namibiese dollar op ‘n donkiekar gelaai en dit by winkels rondom die nedersetting verkoop. Die donkiekar is opgespoor in die Kashikurunda-nedersetting, agt kilometer vanaf Okandjira en 15 sinkplate is teruggevind.