Amptelike ondersoek na sweeftuig-ongeluk het begin

Die direkteur van die direktoraat vliegtuigongeluk-ondersoeke, Magnus Abraham het Sondagnamiddag bevestig dat ‘n ondersoekspan gestuur is na die ongelukstoneel van ‘n sweeftuig by Bahnhof naby Rehoboth. Volgens Sean Naude van die Namibia Marshal Rangers is die slagoffer ‘n buitelandse burger wat getroud was met een van sy Marshal Rangers op die dorp. Die man, ongeveer 52 jaar oud, het alleen in die sweeftuig opgegaan met sy vrou wat op die grond was. Dit het onverklaarbaar neergestort. Abraham het Sondagaand met Kosmos 94.1 Nuus gepraat en sê die ondersoek het reeds begin.