Skokkende onthullings oor Uber…

‘n Ondersoek deur die konsortium van onafhanklike joernaliste het ‘n opskudding veroorsaak toe dit aan die lig gebring het hoe die e-taxi-reus Uber politieke leiers genader het om arbeids- en taxiwette te verslap. Uber het ook geld deur Bermuda en ander belastingtoevlugte gekanaliseer en het oorweeg om voor te gee sy bestuurders word deur geweld geteister om die publiek se simpatie te kry. Die Uber-lêers bevat meer as 124 000 rekords, insluitend 83 000 e-posse en ‘n duisend ander lêers met gesprekke van 2013 tot 2017. Die dokumente wys ook die maatskappy het toegang tot Uber-dienste afgesny en owerhede gekeer om op bewyse beslag te lê tydens klopjagte in minstens ses lande.