Pakistan maak skoonskip in eendagreeks teen Proteas

Krieket: Pakistan het Suid-Afrika in die derde en laaste eendagwedstryd op die Wanderers in Johannesburg met 36 lopies getroef volgens die Duckworth-Lewis-Stern-metode en daarmee skoonskip gemaak in die reeks. Die wedstryd is vir albei spanne tot 47 boulbeurte verkort weens reën. Die 22-jarige Saim Ayub het 101 van 94 balle bygedra vir Pakistan se wentotaal van 308 vir nege. Die Proteas is vir 271 uitgeboul, ten spyte van 81 lopies deur Heinrich Klaasen. Die Protea-kaptein, Themba Bavuma, sê die reeks was teleurstellend.