SA, Botswana werk saam aan handelsuitdagings

Suid-Afrika en Botswana het hulle daartoe verbind om ekonomiese bande te versterk en handelsversperrings te verminder. Dit volg ná ‘n vergadering in Pretoria tussen die adjunkminister van Handel en Nywerheid, Zuko Godlimpi, en Botswana se minister van Handel en Nywerheid, Mmusi Kgafela. Die besprekings het gefokus op die verbetering van handel en beleggings. Hulle het ook gepraat oor hoe om handelsprosesse meer vaartbelyn te maak, en volhoubare nywerheidsontwikkeling en werkskepping te bevorder. Die lande gaan ‘n bilaterale werkgroep stig om handelsuitdagings op te los en nuwe samewerkingsgeleenthede te ondersoek.