El Mayo sê sy arrestasie was ‘n lokval

Die Mexikaanse dwelmbaas Ismael “El Mayo” Zambada is verlede maand deur die seun van Joaquin “El Chapo” Guzman mislei en gedwing om aan boord van ‘n vliegtuig op pad na die Verenigde State te klim. El Mayo het dit in ‘n verklaring gesê. Die verklaring, wat deur Zambada se prokureur versprei is, verskaf die dwelmbaas se weergawe van hoe Amerikaanse owerhede in staat was om beide hom, ‘n medestigter van die Sinaloa-kartel, en Joaquin Guzman Lopez, wat glo aan die hoof van ‘n ander faksie van die kriminele groep gestaan het, vas te trek. Zambada sê dat hy veronderstel was om ‘n vergadering met ander dwelmleiers te hou toe hy gearresteer is.