Venaani kan nie krediet vat nie, so hy sal moet verduidelik

Dit gaan ‘n interessante verkiesingsjaar wees. PDM-leier McHenry Venaani beweer hy was verantwoordelik vir die bedanking van Peter Vilho, voormalige minister van verdediging en veteranesake. Venaani het die opmerkings Saterdag by die PDM-verkiesingsveldtog by Okalongo in die Omusati-streek gemaak. Vilho, wat vir ‘n jaar as verdedigingsminister gedien het, het in April 2021 bedank weens bewerings van finansiële wangedrag en moontlike onreëlmatighede, vanweë ‘n onverklaarde 2,8 miljoen Namibiese dollar in sy Hongkongse bankrekening. Venaani het ook gesê dit is weens die PDM dat die Fishrot-korrupsieskandaal aan die lig gekom het. Kosmos 94.1 Nuus het gepraat met die politieke ontleder dr. Ndumba Kamwanyah, wat sê dat die presidentskandidaat Job Amupanda die een is wat Vilho ontbloot het, en Venaani moet meer detail gee oor hoe hy hierdie kwessies veroorsaak het.