Gesteelde motors dikwels in Suider-Afrikaanse lande gevind

Motordiefstal bly algemeen, met 25 voertuie wat sedert begin Januarie tot op hede as gesteel aangemeld is. Dit is volgens die Namibiese polisie se woordvoerder, adjunkkommissaris Kauna Shikwaambi. Voertuie wat algemeen gesteel word, sluit in Toyota Fortuner-sportnutsvoertuie, Toyota GD6-dubbelkajuite, Mazda Demio’s en Polo Vivo-sedans. Shikwaambi sê motors wat plaaslik gesteel word, word dikwels in lande soos Angola, die Demokratiese Republiek van die Kongo, Zambië, Botswana en Suid-Afrika gevind. Shikwaambi het op OneAfrica gepraat. Nampol versoek eienaars van gesteelde voertuie om die diefstal binne 24 uur aan te meld. Shikwaambi het die versekering gegee dat ondersoekers hard werk om gesteelde voertuie terug te kry.