Oppenheimer maak skoonskip by BAFTAs

Cillian Murphy, wat die hoofrol speel as “die vader van die atoombom”, J Robert Oppenheimer, in die rolprent Oppenheimer, is by die Baftas aangewys as beste akteur – die eerste Ierse ster wat die toekenning wen– terwyl medespeler Robert Downey Jr. in die ondersteunende kategorie vereer is.

Vir Christopher Nolan, die film se bekroonde Britse regisseur – ook bekend vir Inception, The Dark Knight en Dunkirk – was die “ongelooflike eer” van sy eerste Bafta ooit ‘n geval van geluk met die derde probeerslag.

Downey Jr., wat Lewis Strauss, hoof van die Atoomenergiekommissie speel, het ‘n nuwe rekord opgestel vir die langste gaping tussen oorwinnings deur ‘n akteur – met sy jongste trofee wat 31 jaar ná sy eerste Bafta vir Chaplin in 1993 kom. Sir Anthony Hopkins was die vorige titelhouer, met 27 jaar tussen sy oorwinnings in 1994 en 2021.

Oppenheimer se sewe Bafta’s het verlede jaar die oorwinnings deur All Quiet On The Western Front geëwenaar, en was net twee minder om die rekord van alle tye van nege, wat deur Butch Cassidy And The Sundance Kid in 1971 opgestel is, te ewenaar.

Dit was ook ‘n suksesvolle aand vir Emma Stone, wat as beste aktrise aangewys is vir haar vertolking in Poor Things, en Da’Vine Joy Randolph – wat die trofee vir die ondersteunende aktrise huis toe geneem het vir haar vertolking van ‘n bedroefde skoolsjef in The Holdovers.

Ondanks die feit dat Barbie die grootste rolprent van 2023 was en op pad was na die seremonie met vyf benoemings, het Barbie die Bafta’s met leë hande verlaat.