Mbumba reis (al weer) na Ghana

President Nangolo Mbumba het gister na Ghana vertrek om die inhuldiging van Ghana se verkose president, John Mahama, by te woon. Volgens die Presidensie sal sy werkbesoek aan Ghana ook bilaterale en handelsbesprekings insluit. Mbumba sal Donderdag terugkeer van die jongste in ‘n reeks internasionale reise sedert hy in Februarie ingesweer is. Die dagblad The Namibian het in Desember berig Mbumba het in 11 maande na 14 lande gereis, wat hom kwalifiseer vir sowat 1,9 miljoen Namibiese dollar in reistoelaes. Hy het in September net 10 dae in die land deurgebring.